"Yésica, un abrio d’agora", conta, con goyada morisqueta, as nombraderas de una baca roya ansotana que pasa o berano en Aguatuerta, bal d’orixen glaciar do naxe o río Aragón-Subordán

Astí plega a vida d’agora y Yésica romancea por as tornas d’oreo, as leis europeas y a plegada de muitos forastés que fan a besita y se chentan to o que replegan por ixos mons.

A televisión plega también ta Bal d’Aguatuerta, y Yésica tié una riñata con o periodista que eba puyao t’asti pa alcagutiá y chorrontá fatuezas d’a prensa d’o corazón.

O mundo d’agora, muito diferent a como yera antismás, fa que Yésica charre a nusotros d’a vida suya: d’os festejantes, d’as modas… Tamién charra con o onso, belloquero perdiu por sé o zaguero d’una raza gran. Pa forro bota, o boyero de Yésica, yé enamorau d’os trastes modernos y Yésica tie un chip clavau en o anca, asta que un güen día cansa perra de tanta fatueza …

"Yésica, un abrío d’agora" ye a primé comedia feita en ansotano, por o tiempo de felo y o chuco pué decise que ye un tamén alequis, pleno de charraderas agudas que fan que a chen s’arriga pero tamién cabile en como ye o mundo agora.

Entro o programa d’o Festival PIR 2008, por primera begada se fizió a representación d’ista comedia , feita en a bariante ansotana d’o aragonés.

Como nobedá que yera, y con os comedians d’o lugá, bi-staban muitas ganas de biela, asina que a chen plenó o teatro d’a Billa, se tinioron que zarrá as puertas ya que no cabeba un alma más.

O treslau estió güeno y a chen salió goyosa con o deseo de biela otra begada iste mesmo berano, en o mes d’agosto en Ansó, con a plegada d’os veraneantes. Tamién se charra de fé la representación en a capital d’iste Pirineo, Chaca.

Toz os que ficioron a obra no podeban pensá, ni soniando, que chocara tanto y que plegara ta a testera y ta o corazón d’as chens, viejos y chobens, ansotanos y forastés qu’eban beniu de propio ta o PIR 2008.

Yé de deseyá a toz os que treballoron en Yésica: “ Muito cagallón” que en a forma de charra os comedians quié decí que a suerte yé d’o suyo costau.

Muitos creyen qu’a naxiu una cuadrilla d’amantes d’a comedia y d’a lengua d’ os mayores suyos. Agora, o tiempo charrará.

Ansó 14 de julio de 2008

Luns, martes y miércols, dende las 19:30 dica las 21:30 oras.
Siede Sozial, (Coso 112, pral. izda. Zaragoza).

Astí podrez trobar un camatón de materials en aragonés, chambretas, mosica, libros, asinas como bel atro articlo, como achendas en aragonés u artesanía.
Ta sozios/as: 10% d'escuarte!

O benién sabado, 29 de marzo, á las 12:30 oras y en Escuelas Pías de Zaragoza (C/. Conde Aranda, 2) feremos a presentazión d’o libro “Os cuatre ebanchelios d’o nuestro Siñor Chesucristo”, traduzius por Pedro Recuenco, pai escolapio que tenió una gran rilazión con Ligallo de Fablans y con qui ya publiquemos atro libro de referenzia indesincusable ta l’estudio de l’aragonés: “Conchugazión y prenombres febles de l’aragonés”.

Agora, á la fin, ista obra beye a luz dimpués d’un largo prozeso de rebisión y correuzión, fayena que ha feito, de traza sobrebuena, Francho Rodés, miembro de l’Academia de l’Aragonés.

Dende Ligallo de Fablans y Escolapios queremos dar a biemplegata á os Ebanchelios, por benir de qui bienen y porque sin duda representan, antiparti de creyenzias y filiazions relichiosas, una fita capetal en a nuestra cultura.

Tos asperamos. No i manquez

O benién domingo, día 3 de febrero, á las 11:30, en a ilesia d’Escolapios (C/. César Augusto) se ferá a segunda misa en luenga aragonesa d’a istoria d’a ziudá de Zaragoza. Ofiziará o P. Javier Negro, probinzial d’Escolapios y, cape a posibilidá de que coofizie mosen Goyo Forniés, que ya ba fer a primera misa en aragonés o día 10 de chunio en a ilesia de San Juan de los Panetes y que ba suposar, como podrez remerar, un gran esito meyatico y de publico.

A misa en custión estará una eucaristía ordinaria, si bien, tornará á aber-ie un coro, ista begada d’os mesmos Escolapios, que ferá cantas traduzidas y adautadas á esprés y con bella alusión remerando á o P. Pedro Recuenco, mosen escolapio que ba culaborar muito tiempo con Ligallo de Fablans y mesmo plegumos á publicar de conchunta ixe libro de conchugazions berbals en aragonés en o cualo s’incluyiba una alportazión gramatical sobrebuena.

Como beyez, a culaborazión con Escolapios sigue estando mui fluyida y contina dando os fruitos deseyaus. Agora ye ixo, ascape tendremos os Ebanchelios en a carrera (ya son en imprenta) y de seguras que bi abrá más cosas, porque ideyas y proyeutos no mos mancan á denguno d’os dos coleutibos y ganas de triballar tampoco no.

Ya tos daremos notizias de tot o que baiga pasando. Por l’inte ya sapez, toca misa. Tos esperamos á toz o domingo. No i faltez!!

En a sesión plenaria d’o día 16 de mayo de 2007, l’Asambleya Cheneral d’a Organizazión d’as Nazions Unidas (ONU), ha dezidiu declarar l’añada 2008 como Añada Internazional d’as Luengas. Enguán será clau, afirma o testo, ta promober a unidá en a dibersidá d’as luengas. D’a mesma traza, l’Asambleya comboca á os estaus y á o Secretariau Cheneral ta que treballen em a conserbazión y esfensa d’as luengas d’o mundo y demana á o Secretariau que desinne un coordinador ta o multilingüismo.

Antimás de proclamar l’Añada Internazional d’as Luengas, l’Asambleya ha demandau á o Secretariau Cheneral que guaranzie que toz os serbizios lingüisticos d’as Nazions Unidas conten con os mesmos recursos. Istas recomendazions son una referenzia platera á o dominio crexién de l’inglés en detrimento d’as atrás zinco luengas ofizials d’a ONU: l’arabe, o chino, l’español, o franzés y o ruso.

Representans d’esferens países podión reyalizar as suyas alportazions. En iste sentiu, o representán d’Andorrra afirmaba que a “proteuzión d’as luengas ye un d’os pilars alazetals d’a dibersidá cultural”, tanimientres que o de l’estau franzés declaraba que “o dreito á emplegar a luenga propia, a capabilidá de comunicar y, por ixo mesmo, á replecar y á fer-se replecar, a preserbazión d’un erenzio de tantos sieglos, mesmo y tot milenario, debe estar materia de primer orden en as Nazions Unidas”.

A ideya d’adedicar una añada entera á las luengas surtiba fa, alto u baxo, dos añadas. En a 33ena Conferenzia Cheneral d’a UNESCO, reyalizada en Paris á finals de l’añada 2005. Austria proposaba la ideya y atros estaus como Mali la refirmaban. Con ista resoluzión d’o más alto ran, o reconoximiento d’a dibersidá lingüística y a importanzia d’a suya promozión y mantenimiento, pasan á instanzias internazionals

• Chuebes 20 Dic 2007, CP Torrerramona, Zaragoza, 17:30-19 oras.
• Sábado, 22 Dic 2007, Bardallur, Zaragoza, Pabellón d'o lugar, 17:30-19:00 oras.
• Lunes, 24 Dic 2007, Zaragoza, Pza. d'o Pilar, 17-19 oras
• Martes, 25 Dic 2007, Zaragoza, Pza. d'o Pilar, 18:30-20:30 oras
• Miércols, 26 Dic 2007, Uesca, Ludoteca, 18-19:30 oras
• Biernes, 28 Dic 2007, Canfranc, Uesca, 18-19:30 oras
• Sabado, 29 Dic 2007, Samianigo, Uesca, Feria Diversabi, 11-14 oras
• Sabado, 29 Dic 2007, Artieda, Zaragoza, 18-19 oras CAMBEATO

Fa muito tiempo que Ligallo de Fablans conoxeba la esistenzia d’a traduzión que ba fer Pedro Recuenco d’os Ebanchelios y dende allora siempre s’ha pensau que serba una buena cosa que ixe testo salise ta la luz, por o que cuenta, por a suya balgua literaria, por a mena de libro que ye, por a mena de chen á qui ba endrezau y o que ta els sennifica y, en zaguerías, porque toz o cuasi toz conoxemos o suyo conteniu porque asinas mos lo amostrón en a escuela u en casa y, á la finitiba, porque ye un libro de referenzia indesincusable drento d’a nuestra cultura ozidental. O problema yera que no sapeba-nos án yeran ixos ebanchelios, quí los teneba y quí los alzaba.

Á radiz d’a misa en aragonés organizada por Ligallo de Fablans (a primera liturchia propiamén dita en a historia d’a ziudá de Zaragoza), Escolapios, á trabiés de Víctor Longares y Francho Lagraba (profesors d’ zentro) y Javier Negro (o suyo probinzial) se metión en contauto con Fablans y mos confirmón que los alzaban els. Mos reunimos y bam beyer platera la posibilidá de publicar-los. Ascape mos metimos en contauto con l’Academia de l’Aragonés ta que fese as correuzions pertinens y ye de chustizia dizir que li debemos, y en particular á Francho Rodés, un treballo sobrebueno tanto de correuzión como d’imbestigazión. Agora son en fase de correuzión de galeradas y posibles errors tipograficos, que ye fendo, de traza profesional, Pascual Miguel, antigo compañero en Ligallo.

Cal dizir que treballar con Escolapios ye un plazer y una esperienzia sobrebuena porque, antiparti d’a fayena que fan en o suyo zentro amostrando l’aragonés, espardindo a cultura y colaborando con Ligallo de Fablans en tot ixo que lis emos proposau, creyen, como nusatros que cuan una cosa ye buena, no cal asperar masiau en dar-la á conoxer. Asínas pues, y si se cumplen os plazos, en os primers meses de l’añada benién tendremos ebanchelios en aragonés, bien escoscaus y bien majos y pinchos.

Iremos dando notizias de cómo se desembolican as cosas y a traszendenzia que puede tener iste feito.